خطوات اساسية للبحث عن الحمل وربنا يرمنا كلنا يارب ♥

بصو يابنوتات يا عساسيل انتو انا هديكم خبرتي المجمعة في موضوع البحث عن الحمل
1- المفروض الصبر على موضوع الحمل دا خصوصا لو انتي سنة اولى جواز و متحطيهوش في دماغك لان التفكير فيه بيأخره و دا كلام دكاترة كتييييييييييييير مش كلامي
2 -عدت السنة بقى وبندور على اسباب التأخير نخلي الأزواج الرجال المفروض يحللو هما كمان و دي حاجة طبيعية طبعا لا تنقص من رجولتهم شيئ بس لمعرفة السبب لان عدم الخلفة بيكون بنسبة 37% راجع للرجال و 63% راجع عند المرأة
3 - بنعمل ايه بالترتيب بالنسبة للمرأة نروح نطمن على الألتهابات لو موجودة او الفطريات إلي بتقتل الحيوانات المنوية قبل وصولها للرحم ودي ليها ادوية بنخلص منها عادي بردو
4-و نطمن التبويض عند دكتورة النسا و الولادة هيا بتعمل سونار و تشوف الرحم و المبايض لو مفيش على المبايض تكيسات ولو فيه متقلقوش كل حاجة الحمد لله ربنا منزلها علاجها
5 - دلوقتي اطمنا على ان في تبويض و اتباعنا مواعيد التبويض وعملنا اللازم و بردو محصلشي نصيب نعمل ايه في تحاليل تاني يوم الدورة بتكشف عن الهرمونات زي هرمون الحليب و البروجيستيرون و غيره بيسببو تأخر الحمل نعملها و نطمن و متقلقوش الحاجات دي كلها ليها ادوية بتظبطها ومنشطات لتحفيزها
6 - في نفس الشهر بتاع التحاليل يستحسن نعمل اشعة بالصبغة علشان نطمن ان الأنابيب فالوب مش مسدودة وان الرحم شكله طبيعي مش مقلوب ولو الأنابيب مسدودة عادي يابنات في طرق لفتحها غير اصلا ان الأشعة بالصبغة بتساعد على فتحهاو تسليك عنق الرحم من الأفرازات الثقيلة إلي بتسده و دي بتتعمل اليوم السابع او الثامن للدورة ولو الرحم مقلوب بيكون ليه وضعية جماع مختلفة او العادية كمان بس بتنامي على بطنك شوية بعد الجماع
7 - اطمنا على الكلام دا كله و ظبطناه و بردو مفيش حمل يبقى نعمل مسحة على عنق الرحم و مسحة للرحم اولا مسحة عنق الرحم لمعرفة اذا كان في فطريات عميقة مش باينة و هيا دي إلي مسببة عدم وصول الحيوانات المنوية او لو البيئة حمضية زيادة عن اللزوم و بتقتل الحيوانات المنوية ودا بردو الحمد لله ليه ادوية بتظبطوه يعني متقلقوش خير ان شاء الله اما بقى مسحة الرحم لمعرفة هل مناعة الرحم عالية مبتسمحشي للبويضة المخصبة انها تعشش فيه و دي بردو ليها ادوية بتظبها
8 - أحيانا الحاجات دي مش بتكون مستقرة مع المرأة يعني شهر الهرمونات تعلا و شهر تقل و إلخ ............... وأحيانا الرجل هوا إلي بيكون عنده مشاكل في الحالة دي : 1 - لو عنق الرحم مش بيوصل الحيوانات المنوية صح بنعمل تلقيح صناعي يعني ايه : يعني بيأخذو الحيوانات المنوية من الرجل و يحفزو التبويض عند المرأة لزيادة فرصة الأخصاب و يلقحو الحيوانات دي داخل الرحم و يسيبو كل حاجة بقى تمشي لوحدها داخل الرحم يعني الحيوانات تلقح البويضة داخل الرحم 2- المشكلة عند الرجل او المرأة بيلجئو إلى الحقن المجهري وهوا عبارة عن اخذ الحيوانات المنوية من الرجل و اخذ بويضات من المرأة و تلقيحها بافضل الحيوانات المنوية من الرجل الموجودة وكل هذا خارج الرحم صناعيا و بعد ذلك بعد تخصيب البويضة تزرع داخل الرحم و يتم الأنتظار لمعرفة اذا تم تثبيتها داخل الرحم او لا لإعادة المحاولة و طبعا الدكاترة في الموضوع دا بقو ممتازين و الأساليب الحديثة في اختيار افضل الحيوانات المنوية بقت كويسة جدا فنسبة النجاح عالية الحمد لله دا غير الحقن بتاعة تثبيت الحمل إلي بتاخدها المرأة بتزيد من فرصة تثبيت البويضة المخصبة
و أخيرا أحب اقول ان الموضوع دا بإيد ربنا و يمكن لا يوجد اي سبب عند الرجل او المرأة يمنع و لكن ارادة الله في ان يتأخر فعليكم بالدعاء و الأستغفار وربنا كريم ♥

جزاك الله خيرا حبيبتي ياسمين

شكرا ع الموضوع الحلو الي بريح البال يا احلى سمسمة بالمنتدى

الله يخليكم يابنات انتو كلك زوق والله يا مريومة